Ný bók með íslensk-kanadískum smásögum
Út er komin bókin Að vestan. Íslensk-kanadískar smásögur með úrvali af sögum eftir W. D. Valgardson, David Arnason og Kristjönu Gunnars í þýðingu Guðrúnar Bjarkar Guðsteinsdóttur, prófessors í breskum og norðuramerískum bókmenntum við Mála- og menningardeild Háskóla Íslands.
Guðrún Björk ritaði einnig formála sem rekur stuttlega framsækin smásagnaskrif Vestur-Íslendinga, kynnir smásögur og sagnasveiga í Kanada og framlag þessara þriggja margrómuðu rithöfunda til þróunar þeirra. Ritstjóri er Birna Bjarnadóttir, rannsóknasérfræðingur við Háskóla Íslands, og útgefandi er Stofnun Vigdísar Finnbogadóttur í erlendum tungumálum og Háskólaútgáfan, styrkt af Miðstöð íslenskra bókmennta, Sjóði Páls Guðmundssonar frá Rjúpnafelli við HÍ og Styrktarsjóði Stofnunar Vigdísar Finnbogadóttur.
Í bókinni eru fimmtán smásögur sem ekki hafa birst áður á íslensku. Að efni og stíl eru sögurnar fjölbreyttar og grípandi, og sögusviðið er víðfeðmt, spannar allt frá Íslandi og sléttum Norður-Ameríku vestur á Kyrrahafsströnd – allt frá fyrri öldum og fram á okkar daga. Frásagnargleðin er í fyrirrúmi og leiðir lesandann í nýja og óvænta hugarheima.
Guðrún Björk stundaði nám við Háskóla Íslands og Albertaháskóla í Kanada. Hún hefur fjallað um bókmenntaarfleifð íslenskra innflytjenda í Norður-Ameríku og afkomenda þeirra í háskólakennslu, ræðu og riti, hérlendis og erlendis. Var um árabil aðalritstjóri kanadísku fræðiritraðarinnar NACS Text Series og ritstýrði nokkrum bókum á því sviði, en einnig sérhefti Ritsins: Vesturheimsferðir í nýju ljósi (2014) ásamt Úlfari Bragasyni og Birni Þorsteinssyni. Eftir hana liggja greinar og bókakaflar á ensku og íslensku, á liðnu ári um tvítyngda leikgleði Káins í tímaritinu Milli mála og bókinni Tungumál í víðu samhengi. Á þessu ári er meðal annars væntanleg grein um Winnipeg-smásöguna „Vonir“ eftir Einar Kvaran í bókinni Icelandic Heritage in North America hjá Háskólaútgáfu Manitobaháskóla.
![](/sites/svf.hi.is/files/styles/photo_small/public/2023-03/kri_gudrun_bjork_230222_001.jpg?h=e40af391&itok=lC6hxy56 479w, /sites/svf.hi.is/files/styles/photo_medium/public/2023-03/kri_gudrun_bjork_230222_001.jpg?h=e40af391&itok=nfW-GwH2 480w, /sites/svf.hi.is/files/styles/photo_large/public/2023-03/kri_gudrun_bjork_230222_001.jpg?h=e40af391&itok=ywMyQj4I 768w, /sites/svf.hi.is/files/styles/photo_extra_large/public/2023-03/kri_gudrun_bjork_230222_001.jpg?h=e40af391&itok=aCQ0hRbi 1024w, /sites/svf.hi.is/files/styles/photo_full/public/2023-03/kri_gudrun_bjork_230222_001.jpg?h=e40af391&itok=nMmKM8Em 1440w)